February ni 2 atangin hmunphiah leh sawhthing lei tan dawn

by News Editor

Tualchhung News

ZORAM TODAY| 13th January, 2026: Vawiin khan District Agriculture Marketing Committee (DAMC) Kolasib District chu an Chairman Robert C. Lalhmangaiha hovin an thukhawm a, kumin 2026 a Kuthnathawktu te tharchhuah Hmunphiah leh Sawhthing lei dan tur leh ruahmanna te an thlir ho.

He hunah hian Robert C. Lalhmangaiha D.C Kolasib chuan Kolasib chu Agriculture Potential area a nih avangin, farmer te hmasawnna atan tha thlah lo turin kalkhawm te a sawm a, hei bakah hian Kolasib district ah lo neih lam kaihhnawih ah tan lak thar a pawimawh tih a sawi bawk.

Joseph Lalnuntluanga Member Secretary DAMC Kolasib district chuan report pe in sorkar ruahmanna a Sawhthing leh hmunphiah lei tura ruahmanna an siam dan te sawiin, hei bakah hian nikum 2025 khan sorkarin Kuthnathawktu te Buh tharchhuah Quintal 1472 a lei thu leh kumin ah pawh Buhhum Quintal 350 an lei leh tawh thu sawiin, tunkar ah pawh buhhum lei hi an chhunzawm leh tur thu a sawi bawk.

Kolasib district ah hian kuthnathawktu te sawhthing leh hmunphiah leina hmun tur, Khawtinah Primary collection centre ruahman a nih thu te, primary collection centre ten an dahkhawmna tur Secondary Collection Centre (SCC) Thingdawl, Saipum leh Vairengte ah te siam a nih thu te leh, Secondary collection centre atang hian a leitu tur te hnenah hralhchhuah leh a nih tur thu te tarlan ani bawk.

Joseph Lalnuntluanga DAO/ Member Secretary DAMC Kolasib chuan Sorkar ruahmanna angin kumin February ni 2 atanga May ni 30 thleng Kolasib district ah Sawhthing leh hmunphiah lei a nih tur thu sawiin, Primary Society member te tharchhuah ah chauh leh SCC a an lak theih hun chhunga hralh te chauh sorkarin Price support a pek tur thu te sawiin, Hmunphiah ro chu grade thliar lovin Kg1 Rs 80/- in ZOHANDCO in an lei tur thu leh, hmundanga hralh duh zawk an awm pawhin kuthnathawktu ten an duh duhna hmunah an hralh theih tur thu te a tar lang bawk.